غضبان يا مصر

إهداء إلى الشهيد علاء عبد الهادى
-----------------------------------------------------------------------------------
غضبان يا مصر
ومستعر
من اللى يكبت أى حر
من ذل جيشك ومن كلابك
دا الذل مر
القتل فيكى مستباح
والحق راح
ريح العفن فى الضلمة فاح
دا شيء يعر

غضبان يا مصر
من كلب قصر
خدك تكية
فى شكمجية
ضربوا ولادك 
بلطجية
داسوا عيالك
بلطجية
أرواح وطلعت
فى المغربية
مالهمش حصر
غضبان يا مصر
ومن مشيرك بستغيث
ومن الخسيس
ومين يغيثنى
دا مفيش حسيس
دم عيالك صبح رخيص
وأخويا مات فيكى عريس
ناس لاحسين
ومخروسين
بيلحسوا جزمة خسيس
مالهمش حصر
غضبان يا مصر


قفلوا الطريق على حلمنا
ورصاص بيخرق قلبنا
وصدرنا 
وعيوننا راحت
وبرضة ناس مستهونة
و مخونة
بس الوطن محتاجلنا
نموت عشانه
وتعيش كلاب على دمنا


أنا عمرى ما أنسى ضحكتك
حقك هتاخده فى أخرتك
وتعيش خلود فى جنتك
وإحنا هنا فى دنيتك
مستضعفين
ومذلولين
بلسان عبيد
وكرباج كلاب
متلسوعين
مالهمش حصر 
غضبان يا مصر


دموعنا مية نار
فى وشوشنا
دا الذل ويا العار
فى جيوشنا
كلنا بتمنى
خدنا معاك الجنة
وسيبهم هنا فى النار
مخروسين
ولاحسين
وكدابين
مالهمش حصر
غضبان يا مصر