لسة فيكى كلاب

لسة فيكى كلاب يا مصر
لسة فيكى فلول وقصر
والثورة إللى فى حضنك ماتت
والحرية فيكى إتهانت
وإتحرقت علامات النصر

ضحكوا علينا وقالوا حمينا
وإحنا بغبائنا ردينا
الجيش والشعب إيد واحدة
مع بعضنا علشان الوحدة
خدوا أوامرهم قلبوا علينا

إحنا بنفديكى بالأرواح
والظالم قاعد مرتاح
أصل الظلم علينا مستعفى
ورا ضهر الظلمة متخفى
وكل شيء بقى مستباح

إضرب وإدهس فينا كمان
إفهم بقى يا رئيس أركان
إضرب ألف رصاصة فى عينى
عمرك ما هتقدر تعمينى
كله يهون لأجل الأوطان

مهما فضلتوا تقتلوا فينا
مش هتشوفوا الخوف فى عنينا
إحنا عرفنا كلمة لأ
مش ساكتين ومعانا الحق
مهما إختلفت بقى أسامينا

هنفوق والثورة نصحيها
ومن كلابك راح نحميها
ودمك يا شهيد مش ببلاش
وإطمن بقى ماتعبناش
هنكمل وننضف فيها