عايز تغير فى الزمان
عايز تحس إنك إنسان
عايز تعيش لحظه كرامة
نصيحتى ليك روح الميدان
الميدان مافيهوش حرامية
بس ماتقولش بلطجية
الميدان فيه حاجة واحدة
الميدان فيه الشرعية
دول ناس تضحى عشان بلادها
دى ناس قوتها من عنادها
عايزين بلدهم تبقى أحسن
علشان مستقبل ولادها
فى ناس تموت عشان تغيير
وناس تبوس جزمة مشير
دا هيموت بس بكرامة
ودا يعيش جبان حقير
ناس تموت علشان حرية
وناس تشكك فى الوطنية
وناس بتركب , بس دقونها
شبكت طرف الجلابية
أخويا مات وعنيا راحت
ريحة الجثث بانت وفاحت
سكوت الشعب بيموتنا
وخلى كل كلابه إرتاحت
مجلس عار وبيحمى حرامى
عمره ما كان أبدا حامى
بكرة رصاصة هتدخل صدرك
فكر وأوعى تنسى كلامى
قتلوا إمبارح أخونا مينا
قلتوا إعتذروا ودا يكفينا
طب خليك قاعد متكتف
بكرة الدور على واحد فينا
سعادة البيه ممدوح شاهين
عنان والملا وحمدى بدين
سيبونا عايزين الحرية
هو أنتوا ايه مش بنى أدمين
هو إنتوا نسيتوا إحنا مين
إحنا شباب أحرار ثايرين
مهما حاولتوا تعملوا فينا
عمر الظلم ما يكسر عين
بكرة الثورة هتكمل عادى
والحرية هتملى بلادى
مش هنخاف منكم ولا ثانية
مش هنخاف هنقوم وننادى
ثورة تنضف ثورة تشيل
كل خاين كل عميل
وأتغنى بحرية بلدى
وأرفرف أنا فوق النيل
وبصوت واحد بنقول كفاية
كل ظالم وله نهاية
مع بعضنا هنحقق حلم
وهنرسم أجمل حكاية
ليست هناك تعليقات:
إرسال تعليق