- أكد الدكتور إحسان كميل فى تقرير الطب الشرعي عن ضحايا مذبحة بورسعيد عدم وجود أى جرح قطعي او رصاص و أن الوفيات بسبب الإختناق , لا أجد تعليق مناسب للخبر بس واضح إن وجهة النظر الدكتور إنهم ماتوا موتة ربنا أو يمكن ماتوا من الحسرة عشان الأهلى كان خسران ! , حسبي الله و نعم الوكيل
- الفريق أحمد شفيق صاحب اشهر بلوفر فى مصر , مرة يخرج من سباق الرئاسة و يرجع تانى و كمان فى إستطلاع رأى على أحد القنوات واخد أكثر من 60 % و متفوق بكتير عن أبو الفتوح و مرسي و حمدين , أعتقد دا جس نبض المصريين عن مرشح المجلس العسكري بس مش هنسمح طبعا بأى تزوير أو فرض رئيس علينا و مش هنسيب الثورة تضيع و يا ريت المجلس العسكري يسيبنا نختار براحتنا و الرئيس الجاى يبقى من إختيار الشعب , أهو يعملوا حاجة يقابلوا بيها ربنا .
- مظاهرات تأييد للمجلس العسكري بتأكد إنها عادة , كل ما يعملوا مصيبة يبعتوا المأجورين بتوعهم مظاهرات تأييد و طبعا مفيش بلطجية بيقربولهم و مش بعيد البلطجية كانوا مشاركين فى المظاهرة , أنا بقول مأجورين عشان أكيد مفيش حد عارف مساوئ و إنتهاكات المجلس العسكري و لو فى حد مش عارف مساوئ الحكم العسكري أنصحه يتفرج على فيلم البرئ , دا ملمح بسيط من كوارث حكم العسكر .
- الإخوان بعد ما كانوا راضيين و مبسوطين بحكومة الجنزوري و بيهاجموا المتظاهرين أيام أحداث مجلس الوزراء , دلوقتي زعلانين أوى و عايزين يغيروا الحكومة و طبعا دا عشان المصالح إتغيرت , عمو المشير صالحهم على بعض و غير 4 وزراء و قالهم عيب كده يا حبايبي إلعبوا مع بعض .
- بعض الناس شايفين إننا لازم ندعي ربنا و نقرب منه فى العبادة عشان الحال يتحسن و ييجي رئيس محترم و يقضي على الفساد , طبعا التقرب من ربنا مطلوب و شيء جميل بس برضه لازم نعترض على الفساد و نحارب الظلم و مفيش تغيير من غير ما نتحرك .
- بالنسبة للشيخ اللي شايف إن معارضي الإخوان مايفرقوش عن قوم لوط , طبعا تشبيه غريب و غير مقبول , و يا ترى التشبيه بقوم لوط يشمل علاقة الإخوان بالمجلس العسكري ؟
- بعد فشل خيري رمضان و الخبراء الإستراتيجيين فى توقع أماكن الحرايق اللي دايرة فى البلد , أطلب من اللى بيخططوا للحرايق دى يبطلوا عشان خلاص الجو بقى حار و دخلنا على الصيف .
- المرشح عبد الله الأشعل بيطالب بعمل مجلس رئاسي مكون من جميع المرشحين و إتنين من المجلس العسكري عشان المشير مايزعلش برضه , حد قاله إنها رحلة لدريم بارك ؟ , و بعدين مجلس رئاسي ليه و الإنتخابات خلاص على الأبواب , لو مش مقتنع بموعد الإنتخابات إنسحب .
- عمرو موسى المعارض الوطني لما زار المنوفية نزل ضيف عند السيد حماد عضو الحزب الوطني المنحل و أقام مؤتمر بأحدى القرى برعاية وفيق عزت عضو الحزب الوطني المنحل برضه , المعارض طلع وطني جدا على أساس إن كل مواطن مصري راكن الفيل تحت بيته , عموما ممكن أى حاجة تحصل دلوقتي بعض ما إكتشفنا إن إيران دولة عربية .
- الشيخ محمد حسان اللي شارك فى وفد الذل والعار لما كان بيحصل خلاف بين أعضاء هذا الوفد كان بيقول نسأل الكتاتني أميرنا و يجب السمع و الطاعة , ما ترسى على بر يا شيخ بدل التطبيل و التهليل يمين و شمال .
- المناظرة بين عمرو موسى و أبو الفتوح كان كل واحد همه يحرج التانى و يظهر مساوئ التانى و يتفوق فى الكلام , الموضوع كان مسلي بصراحة بغض النظر عن كمية الإعلانات " اللهم لا حسد " , أعتقد إن حمدين صباحي كان أسعد واحد بالمناظرة دي .
- الإعتراض على عمرو موسى إنه فلول و من رجال نظام مبارك مع إنه مصّر إنه معارض قديم , و أبو الفتوح كان من الأخوان و فى خوف يبقى ولائة للجماعة اللي باعت الثورة , لو الموضوع إنحصر بين الأتنين فى الإعادة فأنا أفضّل إتباع المقولة الشهيرة " نص العمى و لا العمى كله " .
- سلاسل بشرية بأعداد مهولة لدعم محمد مرسي , مابقتش أستغرب من حاجة لدرجة عدم الإستغراب من وجود ناس بتنزل سلاسل من أجل شخص و ماينزلوش من أجل وطن .
- صفوت حجازي لا يرى مانع من سيطرة الإخوان على البرلمان و الحكومة و الرئاسة , ليه لأ ؟ الإخوان يعملوا قانون عشان الإخوان يمشوا عليه و لازم طبعا الإخوان يراقبوا الإخوان , الميزة اللي فى الموضوع دا إننا مش هنحتار نخلي نظام الحكم برلماني ولا رئاسي عشان مش هتفرق .
ليست هناك تعليقات:
إرسال تعليق