إبن العسكرى

كتبت فى 27-7-2011


تحية لأبناء شعبى العظيم
صحاب المبادئ و الفكر السليم
صحاب ثورة حرة
و أجندة خارجية
وتمويل من برة
وسلام للبلطجية
كلام فاضى كله
و أهى إسمها حرية
وشهدا ماتوا قتلى
فداء للحرامية


حكاية سودا غامقه
أحكيلكوا أنا التفاصيل
ترزى شاطر عملها
ودا بارع فى التفصيل
حكاية مثل فيها
كل خداع أصيل
قعدنا إتفرجنا عليها
وكأننا تماثيل
خدنا مقلب جليل
الإسم ثورة لكن
ماتت قبل ما تكون
والظلم لسة ساكن
والشك و الظنون
والمخ لسة واقف
لسة اللسان مسجون


أحكيلكوا على صاحبنا
واد جامد و مخلص
أبوه إسمه العسكرى
وإسمه الحقيقى مجلس
بعد ما طلعت بصرخ
على الظلم و الهوان
قاللى يا عم روح
وفضى بقى الميدان
وهجيب أنا الحقوق
قبل طلوع الشروق
القلب كان محروق
بس سمعنا الكلام


وأهو طلع الشروق
وبعد منه شروق
وبعده شفنا 200 شروق
وطن مسروق
ومفيش حقوق
كل اللى فاضل
شوية حروق


رحت وصدرى والع
والنار فيه بتقيد
قولتله وهو سامع
فين حق الشهيد
قاللى يا عم روح
وسيبلى أنا الموضوع
هجيبلك حق أخوك
وهسجن المخلوع
روحت تانى بيتنا
وقفايا كان ملسوع
ولا شفت حاجة منه
ولا حل لى الموضوع


كل إللى خدته منه
وعود على الكراسة
وخدت منه رصاصه
بعديها كمان رصاصة
مش عارف يومها ليه
فكرنى بالقناصة
لما كانو يتسلوا
علينا بالرصاص
طب مين ياخدلى حقى
ويجيبلى أنا القصاص
كل إللى خدته منه
وعود على الكراس


طالع عامللى صاحبى
قال يعنى الواد برئ
وبصباعه يشاورلى
وصوته كان جرئ
إمشى يا واد من هنا
أحسن أخليك غريق
الله يرحم صاحبنا
دا إسمه كان شفيق
اللبس كان بلوفر
والرتبه قال فريق
قاللى هجيبلك أكل
وتحلى بالمصاصة
وكل اللى شفته رصاصة
ووعود على الكراسة


طيب يا عم مجلس
يا إبن العسكرى
نسيت قوام تحية
إللى إسمه الفنجرى
شاطر طلع صباعه
وبعديها قام جرى


أه يا زمان
عجيب يا زمان
فيك قالوا على الثورجية
دول حبة بلطجية
لأ دول مش زى الداخلية
دول أبناء الميدان


الثورة ضاعت منى
ولا شفت فى تغيير
شلنا الكرباج من حسنى
إديناه للمشير


إسمع يا عم مجلس
إسمع يا مفترى
إلحقنى قل ما أشتم
أبوك العسكرى
وأخوك الفنجرى
عمال تبيع فى شعبى
وإخواتى وتشترى
لأ بقى هقوملك
وصدقنى همنعك
إسمعنى مرة واحدة
ولا إشمعنى أسمعك


سيبك من المسكين
إللى حن لأيام زمان
إللى بيقول بابا حسنى
وعمو عز كمان
سيبك من أى حزب
أو سلفى أو إخوان
وإسمع و طيع رجال
هيغيروا الزمان
ويصلحوا المكان
غصبا عنك هتسمع
وهتنفذ كمان
ويلا ماعطلكش
تعالى وخد الأوامر
من هنا , من الميدان


-------------------------------------------------


http://www.youtube.com/watch?v=AqyxJrm6YFY