ما تعيطيش

ما تعيطيش
كل الحروف
كل الدموع
دى ما تساويش
ما تساويش عندهم
رتبة شاويش
أو حتى ظابط ... أو مشير
لكن دموعك
تسوى عندى حاجات كتير
مخليانى
وسط دنيا واسعة .. أسير
ما تعيطيش
دموعك دى مخليانى
مش عايز أعيش
مش طايق أعيش
ملعون أبوه التعب
ملعون أبوه الهتاف
اللى فى آخر المطاف
تكتشف إنه راح .. على مفيش
ما تعيطيش

أنا عارف إنه مش هيفيدك إعتذار
مش عايز أشوف فى عنيكى
لحظة إنكسار
دول سابوا حقك يضيع
بس إطمنى .. تعبوا أوى
عشان يجيبوا حق الحمار

هو إحنا جبنا حق مين فينا ؟
جبنا حقك ؟
حق أختك ؟
و طول ما فى جبناء عايشة وسطينا
القتل عادى
الدبح عادى
يدوسوا عـالعرض و عـالشرف
برضه عادى
والصمت مالينا


فاكرينى ضعيف ومش هقدر
فاكرينى جبان و بتستر
فاكرينى هقعد لسه أفكر
فاكرينى مش هقدر أقولها
يسقط يسقط حكم العسكر