كتبت المقال دا فى 29 مارس 2011 بس ما إتنشرش و حبيت أنشره دلوقتى عشان نراجع مع بعض الحالة اللى كنا عايشينها بعد التنحى و الأمل اللى كان بيملى حياتنا وأنا عن نفسى كنت مليان بالطاقة و حب البلد و عايز الناس كلها تتعب عشان البلد تقوم بعد ما كانت نايمة سنين , بس الأمل دا بقى إحباط و الطاقة إختفت و دا بسبب حكم العسكر اللى حاول بكل الطرق إجهاض الثورة و بسبب الناس اللى فضلت راضية بالظلم و خايفة من التغيير , أتمنى ترجع الروح دى تانى و نقوم ممن تانى نغير الحال دا يإيدنا ....... و أسيبكوا مع المقال .
-------------------
فى مثل كلنا عارفينه من زمان و بنسمعه و خلاص وبنرميه من دماغنا , المثل دا بيقول "من جد وجد و من زرع حصد"
كنا راميينه من دماغنا عشان كذا سبب أولهم إننا كمصريين كسالى بعض الشيئ و فى مننا كتير بينفضوا و بيكبروا دماغهم بس دا مايمنعش إن فى ناس بتشتغل بجد و بتبذل جهد , السبب التانى إن الناس اللى بتشتغل بجد دى ماكنتش بتلاقى الكلام اللى موجود فى المثل دا على أرض الواقع يعنى كانت بتجد بس مابتجدش و لو وجدت فهول قليل لا يكفى مصاريف كذا و كذا و ...كذا
و لما كانت بتزرع ماكنتش بتحصد لأن كان فى ناس تانيه اللى بتحصد و الناس دى كانت حاصده كل البلد تقريبا , ربنا يخلصنا منهم كلهم إن شاء الله
السبب الثالث جاى من السببين الأول و التانى وهو ان الناس بقى زهقت و حست باليأس و إن هم مجرد ضيف و تقيل كمان , كانوا تحت ضيافه الرئيس المحبوب المبجل الأب الحنون و المخلص و صاحب الضربه الجويه الأولى و التانيه و الألف و القائد الأعلى للقوات المسلحه و رئيس السلطه التنفيذيه و رئيس المجلس الأعلى للهيئات القضائيه و الرئيس الأعلى لهيئه الشرطه ورئيس مجلس الدفاع الوطنى ورئيس مراجيح مولد النبى السيد الرئيس محمد حسنى مبارك , كنا تحت ضيافته هو و العائله الكريمه و كنا متقلين عليهم أوى بس الراجل كتر خيره كان مستحملنا و من خوفه علينا كان عايز عيلته تفضل تستضيفنا للأبد , فمن بعده جمال مبارك و أحمد جمال مبارك و ياسر أحمد جمال مبارك و شادى ياسر أحمد جمال مبارك و حسنى شادى ياسر أحمد جمال مبارك و تستمر السلسله الكريمه فى ضيافتها حتى يوم القيامه
الأيام اللى جايه دى لازم نحس إننا عملنا حاجه و إن قيمتنا رجعت "عقبال الجنيه" , فى ظل الظروف اللى إحنا فيها , عايزين محاسبه باقى النظام , محتارين نرشح مين , الناس بتشك فى العسكر و مش مرتاحه , حكومه عصام شرف و مدى تنفيذه لمطالب الثورة , يا ترى الأخوان هيمسكوا البلد ولا أيه و لو مسكوها هيعملوا ايه , السلفيين و غزوة الصناديق و إن اللى قالوا لأ علمانيين و كفرة , فتنه بين المسلمين و المسيحيين , وحاجات كتير أوى فى وسط كل دا لازم نفكر فى حاجه مهمه جدا , الحاجه دى هى بلدنا
دلوقتى البلد محتاجة لولادها عشان تقوم بينا , محدش هيقومها غيرنا إحنا مش هنجيب خبراء أجانب يعنى , سواء كنت مسلم أو مسيحى , سلفى أو إخوان أو وفدى أو ناصرى أو فى حالك و مالكش فى الكلام دا , المهم إنك مصرى مش مهم إنتمائك ايه ولا فكرك المهم هو إننا لازم نحلم
نحلم بمستقبل أحسن لأولادنا و نحلم إنهم يعيشوا عيشه أحسن من عيشتنا
لازم نشتغل بجد و نتعب , ولازم كل واحد فى مجال مختلف أنه يعمل بجد , موظف فى شركه أو هيئه أو أى حاجه إتعب و إحلم ببكرة , مهندس أو دكتور أو محاسب إتعب و إحلم ببكرة ولو طالب ذاكر و إتعب عشان بكره يكون أحلى و لو عامل أو فلاح أو عندك محل أو أى حاجه لازم نتعاون وناخد بإيد بعض.
إضحك من قلبك و عيش حياه كلها تفائل و إطمئنان , شوف الدنيا بجد و حليها فى عينك
أخى الشهيد و أختى الشهيده , إحنا فخورين بكم و عمرنا ما هننساكم , تحيه للأرواح الطاهرة اللى دمهم إمتزج مع دموعنا و عرقنا عشان نخلص بلدنا من الظلم و الظلام , دمكم مش هيضيع هدر , هنحاسبهم و ناخد حقكم , هانبنى و نشتغل و نخلى المستقبل أحلى و نخلى بلدنا أجمل و أقوى ... كل التحيه و الشكر .
الدكتور عصام شرف , الضغوط كثيرة و الظروف صعبه ربنا يكون فى عونك أنت و رجالك , يارب تكونوا عند حسن الظن بكم
بالنسبه لقانون تجريم الإعتصام انا مافهمتش أوى ايه الغرض منه ؟ فإذا كان الغرض منه أن تحارب به الثورة المضاده فأهلا به , و لكن إذا كان الغرض منه هو منع الإعتصام للمطالبه بالتنظيف فأنا أراه غير موفق , اه البلد مش ناقصه مظاهرات و إعتصامات بس دا عشان تنظيف البلد من القمامه اللى كانت فيها و التخلص من القاذورات الفاسده
ولا تنس يا دكتور عصام أنك جئت من الإعتصام
ليست هناك تعليقات:
إرسال تعليق