فات عام على ثورتنا
وما شفنا حريتنا
بس أهو عايشين بنكمل
دى الثورة على جثتنا
لسة إحنا مخربين
عملاء ومجندين
لسة الشهيد بلطجى
لسة فقع العينين
لسة التعذيب شغال
محاكمة وإعتقال
فاكرينا يعنى هنخرس
والنعمة دا شيء محال
لساك يا وطنى جاهل
بتدافع عن اللى فاعل
يقتلنى غدر وأخويا
يضحك ويقول يستاهل
ماتخافش قول وإتكلم
السلطة لازم تتسلم
وهنعمل ثورة تانية
ومن الأولى هنتعلم
عايزين حكومة حرة
دى العيشة لسة مرة
وعشان كده بنقول
الثورة مستمرة
كل الميادين تحرير
وهتسمع منها زئير
هنعدم حسنى مبارك
وهنعدم المشير
كل اللى قتلوا إخواتى
وراهم إحنا يوماتى
وهجيب الحق بإيدى
لو آخر يوم فى حياتى
أنا يوم خمسة وعشرين
عايز حاجة من الإتنين
يا النصر يالشهادة
وأنا منصور فى الحالتين
ليست هناك تعليقات:
إرسال تعليق