- يوم 25 يناير نزلنا علشان نطالب بأبسط حقوق الإنسان , عيش و حرية و عدالة إجتماعية .
- طالبنا بالتغيير الحقيقى وطالبنا بالكرامة و بإسقاط النظام الفاسد , نزلنا عشان بلدنا تبقى أحسن و عشان أولادنا بعد كده يعيشوا حياه أكرم .
- طالبنا بحد أقصى و حد أدنى للأجور و كلنا كنا إيد واحدة و بنهتف بصوت واحد ضد الظلم و الفساد .
- أنت شايف إن النظام سقط ؟ , أنت حاسس بالحرية و الكرامة ؟ , شايف إن العدالة الإجتماعية إتطبقت ؟
ماتضحكش على نفسك ...
- مفيش عدالة إجتماعية إتحققت ولسة فى ناس بتقبض بالآلاف وناس مش لاقيين ياكلوا
- مفيش حرية فى ظل الإعتقالات و المحاكمات العسكرية الباطلة , و القبض على الشباب اللى شاركوا فى الثورة عشان المجلس العسكرى عايز الثورة تفشل
- الشهداء والمصابين ماجبناش حقهم وزاد عليهم كمان شهداء ومصابين
- البنت إتعرت و ماجبناش حقها و سكتنا على كشف العذرية
لحد إمتى هنفضل ساكتين ...
-لازم ننزل يوم 25 يناير القادم علشان نسترد الثورة و علشان نكمل أهدافها و نحقق العدالة الإجتماعية بجد و نواجه الظلم فى سبيل الحرية
-هننزل علشان المجلس العسكرى إمتداد لمبارك و قائد الثورة المضادة
- عشان العنف زاد أضعاف بالدهس بالمدرعات الى الحرب الكيماويه وفقأ الاعين مرورا بهتك الاعراض وكشوف العذريه
- علشان الثوار بيتحاكموا عسكريا و الفلول بيتحكموا فى البلد
- علشان لسة نظام مبارك قائم برعاية المجلس العسكرى
- علشان مفيش قانون واحد اتعمل عشان مصلحه الثورة أو حتى عشان مصلحه المصريين
-علشان الإعلام لسة فاسد بسب المجلس العسكرى , و بسببه بيتم تشويه صورة الثورة
- علشان مفيش ولا مليم من فلوس البلد المنهوبة رجعت و دا بفضل المجلس العسكرى
وثبت لنا بما لايدع مجالا للشك من يوم 11 فبراير حتى الأن إنهم أعدائى وأعداء الوطن والشعب وأنهم يجب أن يحاكموا ...أنا نازل ياجيب حق بلدى ياموت فداها ....
ليست هناك تعليقات:
إرسال تعليق