قتل أخويا برصاصة ظالمة
و رمانى أنا فى زنزانة ضلمة
علشان أحرم أنزل تانى فى مظاهرة
حق الوطن بدفع حسابه
و بدال ما أموت برصاص كلابه
أموت من الحزن و القهرة
عايزنى أقطف الزهرة
أقضى العمر فى الزنزانة
الصبح يلاحق السهرة
عايزنى أبقى خايف
من أمل بكرة
و بعينى دى شايف
و هو بيقتل الفكرة
لكن محال
تقهر رجال
عاشوا يحلموا ببكرة
عاشوا يصنعوا الفكرة
بصرخ بعلو الصوت
عمر الفكرة يوم
ما يجيلها ملك الموت
لسة بتفكروا فى الصمت ؟
لسة الخوف ماليكوا كالعادة
ساندونى
نكسر شموخ السد
و نخفى ظلم إحتد
ساندونى نبنى بكرة لأولادنا
لأحفادنا
ما إحنا شيوخ الغد
لسة الخوف ماليكوا كالعادة
عايزين تعيشوا العمر ذل
عايزين تعيشوا العمر فى عبادة
عايزين تدوقوا المر من تانى
كفاياكوا لحس فى بيادة
بطلوا من جهلكم
تخلقوا السادة
تخلقوا الحاكم الظالم
و مخاوفكم جوة نفوسكم
صحيح فى الظلم ولادة
دم الشهيد على شيء غطى
على الشجر و على البيوت
و عـ الميدان و كتم الصوت
و عـ الفرحة و عـ الغلطة
دم الشهيد غطى
على فرحة الأوطان
أطنان من الأطيان
دم الشهيد غطاها
صبحت قوام بستان
دم الشهيد غطى
عـ اللى رفع راسه
واللى نزل وطى
مابقتش عارف أفرق
بين الصديق و العدو
بين السير و الزحف
و بين العدو
مين اللى قتل الناس ؟
مين اللى ضرب الرصاص ؟
الظلم خبى عنيه و ضرب كده وخلاص
مات اللى مات
عاش اللى عاش
و برضه ساكتة الناس !!
ولسة الظلم بيصبّر
و لسة الجو متعكر
و لسة القتل أهو بيحصد
و باب السجن متسكر
و لسة الظالم السجان
و لسة الحكم للعسكر
و لسة الناس ماليها الصمت
بتفكر !!
لأجل الوطن غالى
هتحملّ الخنقة
و سور السجن عالى
جوة فى خيالى
خلق الضلمة و الزنقة
عشانك يا وطن
هتحملّ الذل و الكتمة
و آخد على الضرب و العتمة
وحدى هنا
إحتراما لهيبة الدولة
و هنا هموت
بعد أوقات من الغمة
و كله يهون و صبر جميل
و كله يهون عشان حرية الأمة
حقك عليا يا وطنى الحبيب
ما أقدرتش أتحمل الضرب و التعذيب
و روحى طلعت للسما
مالحقتش حتى أطهرك
و أحررك
من ظلم عيل من عيالك
مد إيده للغريب
و داس على الباقى
لأجل ينجح بس غرضه
ما يراعى فقر الوطن
ولا حتى مرضه
كل همه يزيد فى بطشه
يزيد فى ظلمه و ضربه و قتله
و اللى يفتح مرة بقه
كف مخبر ييجى لاطشه
ما يراعى جوع الوطن
ولا حتى عطشه
حقك عليا يا وطنى الحبيب
ماقدرتش أتحمل الضرب و التعذيب
و روحى طلعت للسما
قابلت سيد و علاء و مينا
و الشيخ عماد و مصطفى
و سالى و أميرة
وكل اللى ماتوا غدر زى أخويا
و لما أسأل .. مين قتلهم ؟
يقولوا راجل قد أبويا !
له إحترامه لكبر سنه
يقتل و يسجن .. مش مهم دا غصب عنه
و المفروض أخرس
عشان دا راجل قد أبويا
وقابلت واحد كان بيبكى
قولتله ليه بتبكى ؟
من إيه بتشكى ؟
قاللى مستنى الحساب
من القوى .. من الجبار
و أنا مش عارف أصلى خايف
هخش جنة ولا نار
راح باصصله الشيخ عماد
قاله لأ ماتخافش يابنى
الرحمة من رب العباد
ربك رحيم حق و مجيد
و مع الرحيم .. مستحيل
يضيع كده حق الشهيد
و إنت يابنى مت غدر
بتدافع عن الحق الأكيد
إنت يابنى أكيد شهيد
دموعى نزلت من عنيا
بصيت قوام لناحية تانية
لاقيته قاعد هناك بعيد
أه هو دا
خالد سعيد
26-2-2012
ليست هناك تعليقات:
إرسال تعليق